Stéphanie Padovani, "A propos de Paulu Desanti, Fiaschi ed altri scumpienti, Albiana-CCU, 2020, 176 pages "
Paulu Desanti hè un autore di litteratura corsa. Agregatu di lettari, duttore in lingua è cultura corsa è pruffisore à l’università di Corsica.
Hà scrittu racolte di nuvelle cum’è quissa, ma ancu rumanzi o pezze di teatru.
Fiaschi è altri scumpienti, hè una racolta di una trentina dinuvelle chì s’avviccinanu da l’arte di u rumanzu cortu o di e scenette di teatru.
Leghjendu u titulu, omu pudarria pinsà chì si tratta d’una seguita di situazione triste è di sbagli… Mancu appena ! Ghjè una seguita di fole muderne cuntate cù una varietà di ritimu è di musica chì ci incanta à ogni pagina.
L’autore riesce à parla ci di sughjetti muderni di sucietà universali, assai arradicati à i prublemi scuntrati dà a sucietà corsa. Stu passa è vene trà l’universale è u nustrale, l’usu di una scrittura prufonda ma ancu assai scherzosa, dà una riflessione intelligentissima di filusuffia, accessibile à ognunu.
A mudernità di stu libru s’appoghja nantu à i sughjetti scelti, a riflessione filosofica è sucietale, a varietà di toni sempre riesciuta chì dà à u lettore a pussibilità di riflette nantu à « Les choses de la vie ». E donne anu una piazza di primura è l’uchjate à u sinemà o a litteratura sò parechje.
Forse pudemu ritene un parsunaghju chì parla à ognunu :
« Emma » … Issa undunlera maravigliosa ch’eddi t’ani i donni rumanzeschi quand’eddi si movini…
