Ghjermana De Zerbi, « Paul Turchi-Duriani, Pirru è Ricuccata- L’ochju di a luna, Edizione Realità, 2022 »
A storia : u Cornu sacru arrubatu à i Corsi da U Pinzachju.
I persunagi principali ne sò Ricuccata a Tupinetta è Pirru l’Orsu, chi anu da girà a Corsica per ritruvà u tesoru persu, u Cornu. L’altri persunagi, animali simpatichi o maliziosi, aiutanu i nostri dui amichi…o li vanu contru. Cinque libri sò esciuti da u 2018 è contanu l’epupea di u Cornu sacru. Dopu à stu primu titulu vènenu L’oru di Balagna, A Petra di Talavesi, L’Oriu di i Lestrigoni è L’Ochju di a Luna, è noi segitemu i nostri dui amichi, Pirru è Ricuccata, inde a so cerca à traversu tutta a Corsica.
L’inchiesta ci porta à a scuperta di u patrimoniu isulanu, i so lochi di memoria, i so munimenti, e so légende, i so stalvatochji. Dopu a Bastia, andemu in Balagna, in Ajacciu, Cinarca è Urnanu, in Bavella, Bunifaziu è L’Alta Rocca. Eppo’ per st’ultimu libru permiatu, L’Ochju di a luna, scaturimu in e pievi di Castellu, di A Rogna è di A Serra finu à Aleria, sempre in cerca di u Cornu sacru, cù i so intoppi è i nimichi chi ne pruibiscenu l’accessu.
A cerca hè difficiule è u Cornu ùn s’avventa.
U raconta hè scrittu da Paul Turchi Duriani, i dissegni sò di fabien Mariani. Un travaglione tamantu ch’ellu ci vole à salutà. Un CD o dischettu accumpagna i libri è custi avemu u piacè di scopre a storia cuntata da Anna Rocchi è cantata da Doria Ousset, eredi felici di e più belle voici di Corsica, quelle di i Rocchi di Rusiu. Quale saperà di u talentu d’Anna, u so parlatu lindu è tantu armuniosu, a sputichezza di a so prununzia ? Una narratrice cum’ellu si ne sente pocu, a lingua corsa in gloria.
Accantu à Anna è Doria, più di vinti voici di u mondu culturale corsu, cunnisciute da tutti, venenu à dà vita à i persunagi incuntrati.
Aspettemu u sestu vulume chi forse purterà à Pirru è Ricuccata à ritruvà u cornu in Rabbia di Tavignani…
