Scumbugliu in l’universu - Paula Bussi, Ghjacumina Geronimi. Ed. Eoliennes
Ma chì si passerà di notte in l’universu ? In celu cum’in terra, i chjuchi si ghjocanu, facenu piccule scimità, si stuzzicanu, si spaventanu è, anc’assai, stanu à sente à l’anziani… Per quist’annu, a ghjuria di u Libru corsu hà sceltu d’attribuì u premiu « ghjuventù » à « Scumbugliu in l’universu » di Paula Bussi (Piccule piccule storie) è Ghjacumina Geronimi ( Bù chì fretu, Bù chì ventu). Dapoi una decina d’anni (incù « L’Abbici Dì » di Frédérique Bertrand, « U viaghu di Lulina » di Jacline Guerrini è Magali Dulain, a seria di i Bù chì… di Ghjacumina Geronimi è Antea Ferrandi-Perquis, « A zampugnotta » di Michèle Corrotti è Ghjermana de Zerbi, l’edizione Eoliennes /ADECEC accumpagnanu a creazione litteraria per a ghjuventù di modu di più i più impurtante incù « Scumbugliu in l’universu » e duie autrice piglianu i giovani lettori appellamanu per fà li passà una notte in u celente incumpagnia di Mìa, Cecca, Stellu Felice, Ursachjona, Petrinu u Lucendiluna, persunaghji celinchi di sta fola incantevule chì loda l’amicizia, l’aiutu, l’amore è u rispettu di l’anziani, tematiche essenziale da sparte incù chjuchi è maiò : tandu l’imaginariu zitellinu vene impastatu da valori universali di fratellanza è d’umanità. I disegni di Paula Bussi portanu subbitu à sunnià : culori di notte tempu attempu scuri è spampillulenti, muvimenti creati da impulzà u ballu di e stelle, persunaghji stilizati da ricunnosce i so estri in un’ ochjata. A lingua, capiscitoghja è linda, areca un accrescimentu di u ripertoriu linguaghjaghju è linguisticu di u zitellu inseme à una riflessione murale è un arricchimentu di e so cunniscenze scentifiche è estetiche. Un’andatura di primura in u cuntestu sucietale di a Corsica d’oghje.
Pascale Antonetti
